ബാബർ അസമിന്റെയും ഷഹീൻ അഫ്രീദിയുടെയും ഇൻസ്റ്റാ​ഗ്രാം അക്കൗണ്ടുകൾക്ക് ഇന്ത്യയിൽ വിലക്ക്

പാകിസ്താൻ ക്രിക്കറ്റ് താരങ്ങളായ ബാബർ അസമിന്റെയും ഷഹീൻ അഫ്രീദിയുടെയും ഇൻസ്റ്റാ​ഗ്രാം അക്കൗണ്ടുകൾക്ക് ഇന്ത്യയിൽ വിലക്ക്. നിയമപരമായ കാരണങ്ങളാലാണ് അക്കൗണ്ടുകൾ വിലക്കിയതെന്ന് ഇൻസ്റ്റാ​ഗ്രാം അറിയിച്ചു. പാക് താരങ്ങളുടെ അക്കൗണ്ടുകൾ ഇന്ത്യയിൽ നിന്ന് ഓപൺ ചെയ്യുന്നവർക്ക്, ഈ അക്കൗണ്ടുകൾ ഇന്ത്യയിൽ ലഭ്യമല്ലെന്നും ഇവ നിയന്ത്രിക്കാനുള്ള ഒരു നിയമപരമായ അഭ്യർത്ഥന ഞങ്ങൾ പാലിച്ചിരിക്കുകയാണെന്നുമാണ് കാണിക്കുന്നത്.

ജമ്മു കശ്മീരിലെ പഹൽ​ഗാമിലുണ്ടായ ഭീകരാക്രമണത്തിന് പിന്നാലെയുള്ള കേന്ദ്ര സർക്കാർ നടപടിയെന്നാണ് ഇൻസ്റ്റാ​ഗ്രാം അക്കൗണ്ടുകളുടെ വിലക്കിനെ കരുതുന്നത്. നേരത്തെ ദോഷകരമായ ഉള്ളടക്കം പ്രചരിപ്പിച്ചതിന് 16 പാകിസ്താൻ യൂട്യൂബ് ചാനലുകൾക്ക് കേന്ദ്രസർക്കാർ വിലക്കേർപ്പെടുത്തിയിരുന്നു.

അതിനിടെ പഹൽ​ഗാം ഭീകരാക്രമണത്തെ തുടർന്ന് ഇന്ത്യയും പാകിസ്താനും തമ്മിലുള്ള ആഭ്യന്തര പ്രതിസന്ധി ക്രിക്കറ്റിനെയും ബാധിക്കുന്നതായി റിപ്പോർട്ടുകളുണ്ട്. ഓ​ഗസ്റ്റിൽ നടക്കേണ്ട ഇന്ത്യയുടെ ബം​ഗ്ലാദേശ് പര്യടനവും സെപ്റ്റംബറിൽ നടക്കേണ്ട ഏഷ്യാ കപ്പും റദ്ദാക്കുമെന്നാണ് സൂചന. പഹൽ​ഗാം ആക്രമണത്തിന് പിന്നാലെ ബം​​ഗ്ലാദേശിലെ ഒരു വിരമിച്ച മേജർ ജനറലിന്റെ പ്രസ്താവനയാണ് ക്രിക്കറ്റ് പരമ്പരയ്ക്ക് തടസമാകുന്നത്. ഇന്ത്യ പാകിസ്താനെ ആക്രമിച്ചാൽ ഇന്ത്യയുടെ വടക്ക് കിഴക്കൻ സംസ്ഥാനങ്ങൾ ബം​ഗ്ലാദേശ് പിടിച്ചെടുക്കുമെന്നായിരുന്നു പ്രസ്താവന. ബം​ഗ്ലാദേശ് പ്രധാനമന്ത്രി മുഹമ്മദ് യൂനസുമായി അടുത്ത ബന്ധമുള്ള വ്യക്തിയാണ് ഇയാളെന്നാണ് റിപ്പോർട്ടുകൾ.

ഏപ്രിൽ 22നാണ് ജമ്മു കശ്മീരിലെ പഹൽഗാമിൽ പാകിസ്താന്റെ പ്രകോപനമുണ്ടായത്. ഭീകരാക്രമണത്തെ തുടർന്ന് 26 ജീവനുകൾ നഷ്ടമായിരുന്നു. പിന്നാലെ ഇന്ത്യയും പാക്കിസ്താനും തമ്മിലുള്ള ബന്ധം വഷളായി.

Content Highlights: Instagram bans Babar Azam, Shaheen Afridi banned in India